ABANYESHURI BAGERA KURI 42 BATANGIYE AMASOMO KU BURENGANZIRA BWA MUNTU

Ku gicamunsi cyo kuwa 6 Kanama 2019 ku cyicaro gikuru cy’umuryango Ajprodho jijukirwa hatangijwe ku mugaragaro amasomo ajyanye n’uburenganzira bwa muntu  azamara ’amezi atatu.

Iki cyiciro ni icya gatandatu kuko ibindi byiciro byasoje amasomo atandukanye ariko hibandwa cyane ku masomo ajyanye n’uburenganzira bwa muntu.

Urubyiruko  rugera ku 168 rumaze gusoza amasomo yarwo kandi bavuga ko bibagirira akamaro kanini mu buzima bwa buri munsi kuko byunganira ubumenyi baba barakuwe mu mashuri .

Umwe mu barimu bazatanga aya masomo witwa Patrick Ufashingabo atangaza ko abanyeshuri bazungukira byinshi muri yo kuko bavanamo ubumenyi bw’inyongera ku bumenyi  bavanye mu ishuri bubafasha mu gushaka imirimo no gukoresha amahirwe ahari ndetse no kuba abavugizi ba bagenzi babo  mu bijyanye n’uburenganzira bwa muntu.

Umunyamabanga nshingwabikorwa wa AJPRODHO jijukirwa atangiza aya mahugurwa yabwiye abanyeshuri bayitabiriye ko muri aya mahugurwa bazigiramo byinshi bizabafasha mu buzima bwabo  birimo kubaha icyerekezo cy’imirimo ,kubaha ubujyanama mu byo bize no kuzana impunduka muri sosiyete nyarwanda n’ibindi.

 

Umunyamabanga nshingwabikorwa wa AJPRODHO jijukirwa aganiriza bamwe mu banyeshuri bitabiriye aya masomo .

Aba banyeshuri bazigishwa n’abarimu batandukanye bize amasomo atandukanye ariko hibandwe by’umwihariko ku masomo ajyanye n’uburenganzira bwa muntu.  

Benshi muri abo banyeshuri bitabiriye aya masomo  ni abanyeshuri barangije icyiciro cya mbere cya Kaminuza baturutse mu bigo by’amashuri na kaminuza bitandukanye .